مظفرآباد(نامہ نگار)چکار کے علاقے ٹنڈالی میں پیش آنے والے ایک انتہائی افسوسناک واقعے نے پورے علاقے کو سوگوار اور عوام کو تشویش میں مبتلا کر دیا،جہاں اطلاعات کے مطابق مسلم لیگ (ن) خواتین ونگ ضلع جہلم ویلی کی جنرل سیکرٹری عشرت خالد، زوجہ راجہ خالد نذیر کے گھر میں مبینہ طور پر آٹھ سالہ بچے کے ہاتھوں فائر ہونے کے نتیجے میں گیارہ سالہ بچی جاں بحق ہو گئی۔ بتایا جاتا ہے کہ جاں بحق ہونے والی بچی رشتے میں بچے کی کزن تھی، یتیم اور بے سہارا تھی اور ٹنڈالی میں اسی گھر میں رہائش پذیر تھی۔ایک معصوم بچی کی المناک موت محض ایک افسوسناک واقعہ نہیں بلکہ اس نے ہمارے معاشرے میں اسلحے کی غیر ذمہ دارانہ موجودگی، بچوں کی پہنچ میں خطرناک ہتھیار رکھنے اور قانون پر عمل درآمد کے حوالے سے کئی بنیادی سوالات کھڑے کر دیے ہیں۔آخر گھر میں اسلحہ کس کا تھا؟سب سے اہم سوال یہ ہے کہ آٹھ سالہ بچے کے ہاتھ میں اسلحہ کیسے آیا؟ کیا اسلحہ لائسنس یافتہ تھا یا بغیر لائسنس رکھا گیا تھا؟ اگر لائسنس موجود تھا تو اسے بچوں کی پہنچ سے دور رکھنے کے قانونی اور اخلاقی تقاضے کیوں پورے نہیں کیے گئے؟ اور اگر اسلحہ غیر قانونی تھا تو متعلقہ ادارے اس معاملے کی مکمل چھان بین کب کریں گے؟

ضلع مظفرأباد/ جہلم ویلی اور بالخصوص چکار میں اسلحے کی نمائش، ہوائی فائرنگ اور مبینہ طور پر بغیر لائسنس اسلحہ رکھنے کے رجحان پر پہلے ہی عوامی سطح پر تشویش پائی جاتی ہے۔ آئے روز فائرنگ کے واقعات اور حادثات کی اطلاعات اس بات کا تقاضا کرتی ہیں کہ انتظامیہ، پولیس اور متعلقہ قانون نافذ کرنے والے ادارے محض وقتی کارروائیوں کے بجائے مستقل اور مؤثر اقدامات کریں۔

اس واقعے کو محض حادثہ قرار دے کر نظر انداز نہیں کیا جا سکتا۔ یہ طے کرنا تفتیشی اداروں کی ذمہ داری ہے کہ فائرنگ کن حالات میں ہوئی، اسلحہ کس کی تحویل میں تھا، بچے تک کیسے پہنچا اور کیا اسلحہ رکھنے یا محفوظ کرنے میں کسی قسم کی مجرمانہ غفلت برتی گئی؟یہ بھی ضروری ہے کہ تفتیش میں ہر ممکن پہلو کا جائزہ لیا جائے تاکہ یہ واضح ہو سکے کہ واقعہ واقعی غیر ارادی حادثہ تھا، سنگین غفلت کا نتیجہ تھا یا اس کے پیچھے کوئی اور حقیقت موجود ہے۔ کسی کو تحقیق سے پہلے مجرم قرار دینا درست نہیں، لیکن کسی معصوم جان کے ضیاع کو معمولی واقعہ سمجھنا بھی ناقابل قبول ہے۔اس افسوسناک سانحے کا ایک اور قابلِ توجہ پہلو مقامی صحافتی حلقوں کی مبینہ خاموشی ہے۔ سوال یہ ہے کہ جب کسی معمولی نوعیت کے واقعے پر سوشل میڈیا پر خبریں اور پوسٹیں گردش کرنے لگتی ہیں تو ایک گیارہ سالہ بچی کی المناک موت پر ذمہ دارانہ صحافتی آواز کیوں سنائی نہیں دیتی؟

کیا صحافت کا کام صرف بااثر شخصیات کی تقریبات، سیاسی سرگرمیوں اور معمولی واقعات کی تشہیر تک محدود رہ گیا ہے؟ کیا ایک یتیم اور بے سہارا بچی کی زندگی کی کوئی اہمیت نہیں؟ صحافت کا بنیادی فرض مظلوم کی آواز بننا، حقائق سامنے لانا اور عوامی مسائل کو اجاگر کرنا ہے۔ اس واقعے پر خاموشی اختیار کرنے والے صحافتی حلقوں کو بھی اپنے کردار پر غور کرنا چاہیے۔

سیاسی سماجی عوامی حلقوں نے مطالبہ کیا ہے کہ

واقعے کی فوری، شفاف اور غیر جانبدارانہ تحقیقات کرائی جائیں۔اسلحے کی ملکیت، لائسنس اور قانونی حیثیت کی تصدیق کی جائے۔اسلحہ بچے کی پہنچ میں آنے اور فائر ہونے کے تمام حالات کا تعین کیا جائے۔

اگر کسی کی غفلت یا قانون شکنی ثابت ہو تو بلاامتیاز قانونی کارروائی کی جائے۔ مظفرآباد،

چکار اور ضلع جہلم ویلی میں غیر قانونی اسلحے، کھلے عام اسلحے کی نمائش اور ہوائی فائرنگ کے خلاف مؤثر آپریشن کیا جائے۔جاں بحق بچی کے ورثا کو انصاف کی فراہمی یقینی بنائی جائے اور انہیں تفتیشی پیش رفت سے آگاہ رکھا جائے۔سول سوسائٹی نے سوالات کئے ہیں کہ

کیا کسی گھر میں اسلحہ رکھنا اس وقت تک محفوظ تصور کیا جا سکتا ہے جب تک وہ کسی معصوم کی جان نہ لے لے؟ کیا بچوں کے ہاتھوں خطرناک ہتھیاروں تک رسائی روکنا والدین اور اسلحہ رکھنے والوں کی ذمہ داری نہیں؟ اور کیا انتظامیہ کسی بڑے سانحے کے بعد ہی حرکت میں آئے گی؟

یہ معاملہ کسی سیاسی وابستگی، خاندانی تعلق یا سماجی اثر و رسوخ سے بالاتر ہو کر دیکھا جانا چاہیے۔ ایک گیارہ سالہ بچی کی زندگی واپس نہیں آسکتی، لیکن اس کی موت کی مکمل حقیقت سامنے لانا اور آئندہ ایسے واقعات کی روک تھام کرنا ریاستی اداروں اور معاشرے کی مشترکہ ذمہ داری ہے۔

چکار کی انتظامیہ، پولیس، ضلعی حکام اور صحافتی حلقوں سے مطالبہ ہے کہ اس واقعے کو دبنے نہ دیا جائے، حقائق عوام کے سامنے لائے جائیں اور اس معصوم بچی کو انصاف دلانے کے لیے عملی اقدامات کیے جائیں۔

اللہ تعالیٰ مرحومہ بچی کی مغفرت فرمائے، اسے جوارِ رحمت میں جگہ عطا فرمائے اور اس کے لواحقین کو یہ ناقابلِ تلافی صدمہ برداشت کرنے کی ہمت دے۔